團圓

中秋節短暫遇見嘅你，取名團圓🌕
求助人話團圓原本係社區貓，有個好朋友虎紋貓，好朋友有日flu被帶走，漏低咗佢，之後佢就得返自己一個鬱鬱寡歡，唔肯食嘢，求助人搵咗幾間機構都冇人願意接收佢，輾轉間搵咗我哋。
團圓喺中秋嘅下午入院，求助人話佢已經20幾日冇食嘢😢當時醫生幫佢度體溫已經得返33.8度，企都企唔到起身；口又流血，流到手都有血；嚴重脫水貧血；白血球爆；黃膽素高，應該因為太耐冇食嘢而脂肪肝；腎指數同胰臟指數稀釋完再睇都係爆數，估計腎衰竭加胰臟炎，簡單講就係情況非常差，又係叫伙伴要有心理準備😔
呢幾日情況相約，體溫keep住低，唔太食到嘢，只能瞓喺度，伙伴去探佢都只可以好微弱咁嗚幾下，我哋每日都同佢講加油，亦一齊同佢努力，不過最後喺今日都係捱唔到，離開咗呢個煩擾嘅世界，希望佢至少係舒服地離開😢
即使知道接咗佢嘅醫療費用都好大機會超過10k，但我哋仍然嘗試盡最大嘅努力，希望帶團圓離開鬼門關，帶佢去食好食嘅罐罐。但或者佢都已經攰了，彩虹橋嘅另一邊就由柑桔同小叉接佢啦。